پێشنیوەڕۆی ڕۆژی پێنجشەممە 6ی تەمموزی 2023 لە سەلاحەددین مەسعود بارزانی پێشوازی لە ئۆلیڤییێ دیكۆتینی كونسوڵی گشتیی فەڕەنسا لە هەولێر كرد.
لە دیدارەكەدا كە كونسوڵی گشتیی فەڕەنسا بەبۆنەی كۆتایهاتنی بە ئەرك و كاری لە هەرێمی كوردستان و بە مەبەستی ماڵئاواییكردن ، سەردانی مەسعود بارزانی كردبوو، كونسوڵی گشتیی فەڕەنسا وێڕای گەیاندنی سڵاوی ماكرۆن بە مەسعود بارزانی، ڕۆڵ و جێدەستی بارزانیی لە پاراستنی پڕۆسەی سیاسی و چارەنووسی گەلی كوردستان بە كاریگەر و سەرەكی لەقەڵەم دا.
هەروەها پێزانینی زۆری بۆ خەڵكی كوردستان و حكوومەتی هەرێمی كوردستان هەبوو و خۆشحاڵیی خۆی ڕاگەیاند كە توانیویەتی لە كوردستاندا دۆستی زۆر پەیدا بكات. هاوكاتیش خەبات و قوربانیدان و ماندووبوونی گەلی كوردستانی بۆ گەیشتن بە ئازادی بەرز نرخاند. ئەوەشی خستەڕوو لە هەموو ئاستێكدا چ لەناو حكوومەت و چ لەناو خەڵك و ڕای گشتیی فەڕەنسادا ویستی ئەوە هەیە كە دەبێ فەڕەنسا دۆست و پشتیوانی دۆزی گەلی كوردستان بێت.
هەر لەو دیدارەدا مەسعود بارزانی وێڕای دووپاتكردنەوەی دۆستایەتیی نێوان گەلی كوردستان و فەڕەنسا، سوپاسی هەوڵ و كارە باشەكانی ئۆلیڤییێ دیكۆتینی كونسوڵی گشتیی فەڕەنسای كرد لەماوەی كاركردنی لە هەرێمی كوردستان و بە دۆستێكی باشی خۆی و گەلی كوردستانی وەسفكرد. هەورەها هیوای سەركەوتنی بۆ خواست لە ئەرك و كاری تازەیدا.
بارودۆخی ناوخۆی هەرێمی كوردستان تەوەری تری ئەو دیدارە بوو.
