کۆمپانیای ئەپڵ بڵاویکردووەتەوە، رۆژی (12ـی ئەیلوولی 2023) بە فەرمی وەشانی نوێی مۆبایلی ئایفۆن 15 رادەگەیەنێت کە وابڕیارە لە ئیڤێنتێكی تایبەت لە بارەگای سەرەکی خۆی لە ویلایەتی کالیفۆڕنیا لە کاتژمێر 20:00 بە کاتی هەولێری پایتەختی هەرێمی کوردستان سازبکات.
کۆمپانیای ئەپڵ باسی لەوەشکردووە، ئیڤێنتی راگەیاندنی ئایفۆن 15 لە سەرجەم پلاتفۆڕمەکانی تایبەت بە خۆی بەشێوەی راستەوخۆ دەگوازێتەوە و چاوەڕێ دەکرێت پێشوازییەکی زۆر لەو وەشانە نوێیەی ئایفۆن بکرێت بەتایبەتی لە خستنەڕووی چەند رەنگێکی جیاواز و تایبەتمەندی نوێ دەکرێت.
هەروەها بەپێی زانیارییەکان، ئایفۆن15 شێوازی بارگاویکردنی بۆ جۆری یو ئێس بی – سی (USB-C) بگۆڕێت کە یەکەمینجارە لە ئایفۆندا بەکاربهێندرێت، ئەمەش دوای بڕیارەکەی یەکێتی ئەوروپا دێت لە مانگی ئۆکتۆبەری ساڵی رابردوو کە فرۆشتنی سەرجەم مۆبایل و ئامێرە ئەلیکترۆنییەکانی پابەند دەکات بە بەکارهێنانی ئەو شێوازی بارگاویکردنە و 28ـی کانوونی یەکەمی 2024ـی وەک دوا وادە دیاریکردووە بۆ کۆمپانیاکان.
هاوکات ئەپڵ نەک تەنیا ئایفۆنەکان، بەڵکو شێوازی بارگاویکردنی ئایرپۆدەکانیش (AirPods) بۆ جۆری یو ئێس بی – سی (USB-C) بگۆڕێت.
هەروەها باس لەوەش دەکرێت کە کۆمپانیای ئەپڵ گۆڕانکارییەکی دیکەش لە ئامێرە نوێیەکەی ئافۆندا بکات، ئەویش بە گۆڕینی دووگمەی بێدەنگ کردن و گۆڕانکاریش لە رووکاری ئامێرەکەدا بکات.
