مەکتەبی سیاسی یەکێتی کۆبوەوە و لە کۆبونەوەکەدا لێپرسراوانی مەکتەبەکانی یەکێتی و ئەرکەکانیان دیاریکراوە.
سەعدی ئەحمەد پیرە، وتەبێژی یەکێتی، لە کۆنفرانسێکی رۆژنامەوانییدا رایگەیاند، مەکتەبی سیاسیی یەکێتی کۆبووەتەوە و بەرپرسی مەکتەبەکان و ئەرکەکانیانی دیاریکردووە، بەجۆرێک د.خەسرەو گوڵ محەمەد بووە نوێنەری سەرۆکی یەکێتی و رزگار حاجی حەمە وەک لێپرسراوی دەزگای ھەڵبژاردن مایەوە، ھەروەھا سەعدی ئەحمەد پیرە وتەبێژی یەکێتی و سەرکەوت زەکی لێپرسراوی مەکتەبی رێکخستن و عیماد ئەحمەدیش وەک لێپرسراوی مەکتەبی راگەیاندن و ھۆشیاری دیاریکراوە.
وتیشی، قوباد تاڵەبانی وەک سەرپەرشتیاری سکرتارییەتی سەرۆک مام جەلال و دەرباز کۆسرەت رەسوڵ لێپرسراوی مەکتەبی پەیوەندییەکان دیاریکراون، ھەروەھا بڵێسە جەبار فەرمان وەک لێپرسراوی مەکتەبی شەھیدان و نزار ئامێدی بۆ لێپرسراوی مەکتەبی یەکێتی لە بەغداد و بورھان سەعید سۆفیش وەک لێپرسراوی مەکتەبی رێکخراوە دیموکراتەکان دانراون.
راشیگەیاند، لە کۆبونەوەکەیاندا شێخ ئەحمەد حەمەکەریم و شوان قادر وەک لێپرسراوانی مەکتەبی دارایی و ئیدارەی گشتی و د.یوسف گۆران بۆ لێپرسراوی مەکتەبی دیراسات و تەلار لەتیفیش بۆ لێپرسراوی مەکتەبی کاروباری یاسایی دانراون.
سەعدی پیرە وتیشی، شاڵاو شێخ سەڵاحیش وەک لێپرسراوی مەکتەبی سەرۆکی یەکێتی دەستنیشانکراوە.
