هێزەکانی پێشمەرگە شەش بنکەی سەربازی لە چیای قەرەچووغ دەگرنە دەست

ئەمڕۆ چوارشەممە 1-11-2023 كۆبوونەوەی هاوبەشی هێزی پێشمەرگەی كوردستان و سوپای عێراق لە فیرقەی 14ی مەخمور بەرێوەچوو، کە هەر یەك لە سیروان بارزانی،بەرپرسی میحوەری شەشی گوێر- مەخمور و فەریق روكن عیسا عوزێری،سەرۆك ئەركانی هێزی پێشمەرگەی كوردستان و فەریق روكن عەبدولئەمیر یارەڵڵا،سەرۆك ئەركانی هێزەكانی سوپای عێراق و لیوا روكن عەبدوڵڵا رەمەزان، فەرماندەی عەمەلیاتی نەینەوا، لەگەڵ ژمارەیەك فەرماندەی ديكە بەشداربوون.

لەکۆبوونەوەکەدا بڕیاردرا شەش بنكەی سەربازی بۆ هێزەكانی پێشمەرگەی كوردستان و سێ بنكەی سەربازی بۆ هێزەكانی سوپای عێراق  لە چیای قەرەچووغ دیاری بكرێت.

بەگوێرەی زانیاریەکان، كۆبوونەوەكە بەسەركەوتووانە كۆتایی هاتووەو هێزەكانی پێشمەرگەو سوپای عێراق لەسەر خاڵە ناكۆكەكان رێككەوتوون.