وەزارەتی ناوخۆ هۆشداری بە بەکارهێنەرانی تیکتۆک دەدات

هەر کەسێک ڤیدیۆی تەقەکردن لە تیکتۆک و تۆڕە کۆمەڵایەتییەکانی دیکە بڵاو بکاتەوە، سزا دەدرێت.

د.هێمن میرانی، بەڕێوەبەری گشتیی دیوان لە وەزارەتی ناوخۆ گوتی: بە سەدان کەس لەسەر ئەوەی چەکی بێ مۆڵەتیان لابووە، پێبژارندی دارایی (غەرامە) و بەندکراون و کەیسەکانیان لای دادگایە.

هێمن میرانی جەختی کردەوە، هەر کەسێک ڤیدیۆی تەقەکردن لە تیکتۆک و تۆڕە کۆمەڵایەتییەکانی دیکە بڵاو بکاتەوە، لە لایەن داواکاری گشتی سکاڵای لەسەر تۆمار دەکرێت و دەدرێتە دادگا. 

وەزارەتی ناوخۆ لەپێناو ڕێگریکردن لە بوونی بازاڕی نایاسایی جۆراوجۆری چەک، ئێستا پڕۆژەیەکی هاوبەش لە نێوان کەرتی گشتی و تایبەت لە شارەکانی هەولێر و دهۆک و سلێمانی جێبەجێ دەکات، تا سێ بازاڕی هاوچەرخ کە بە سیستەمی ئەلیکترۆنی کۆنتڕۆڵ دەکرێن دروست بکرێن.