ئەمڕۆ هەینی 23ی کانوونی دووەمی 2026، سەرۆک مەسعود بارزانی لە چوارچێوەی سەردانە فەرمییەکەی بۆ ئیتاڵیا، سەردانی نوێنەرایەتیی حکومەتی هەرێمی کوردستانی لە ڕۆما کرد و لە لێدوانی بۆ ڕۆژنامەوانان لەبارەی ڕەوشی ڕۆژئاواوە ڕایگەیاند: “بگاتە ئەوەی تەعدا لە کورد بکرێت، هەموو شتێک دەکەین”.
پوختەیەک لە گوتە و لێدوانەکانی سەرۆک بارزانی:
- ئیتاڵیا هەمیشە هەڵوێستێکی زۆر دۆستانەی هەبووە بەرانبەر بە گەلی کوردستان و دۆستن.
- قەداسەتی پاپا زۆر بە پەرۆشە بۆ دۆخی کوردستان.
- ئیتاڵیا دڵنیاییان دا لەسەر بەردەوامیی پشتیوانیی گەلی کوردستان.
- نابێت غەدر لە کورد بکرێت.
- پەیامی من ئەوەیە، بەرگریی لە مافی گەلی کورد بکەن، بەڵام بە هیچ شێوەیەک پشتیوانیی لە توندتیژی نەکەن.
- شەڕی دوو نەتەوە کارەساتە نابێت کورد بەرەو ئەوە بچێت.
- بە ئەحمەد شەرعم گوت، شەڕی سیاسی دەبێ چارەسەر ببێت، بەڵام نابێت کورد دەستدرێژی بکرێتە سەر.
- ئەم کێشانەی ئێستا ڕوودەدەن بەشێکی پەیوەندیدارە بە هۆزە عەرەبییەکانی سووریا.
- لە مێژە مەزڵوومم ئاگادار کردبووەوە کە ناوچە عەرەبنشینەکان چارەسەر بکات، کە ڕەنگە لە داهاتوو کێشەیان بۆ دروست بکات.
- هەموو هەوڵێکمان ئەوەیە ئەو ناوچە کوردییانەی کە بە دەستەوە ماون، بمێنن و مافی گەلی کورد پارێزراو بێت.
- شەڕ لە بەرژەوەندیی کەسدا نییە.
- مەترسیی داعش یەکجار زۆرە، داعش تەواو نەبووە و ئەم دۆخەی ئێستا لە سووریا دروست بووە دەرفەتێکی زێڕینی بۆ داعش ڕەخساندووە.
- ژمارەیەکی زۆر لە داعشەکان لە زیندانەکانی سووریا هەڵاتوون، ئەمە مەترسییەکی زۆر گەورەیە.
- ئێمە دڵ و دەروونمان لەگەڵ خوشک و براکانمانە بابەتەکە میانگیری نییە.
- هیچ کاتێک بڕوام بە شەڕ نەبووە و حەزیشم بە شەڕ نەبووە، بەڵام بگاتە ئەوەی تەعدا لە کورد بکرێت، ئەو کاتە ئێمە ئامادەین بۆ هەموو شتێک.
- ئەگەر بەرنامەیەک هەبوو تەعدا لە کورد بکرێت، کورد نەمێنێت لە ناوچەکە، ئەو کات ئێمە هەموو یەکین.
- ئەوەی بۆ کۆبانێ پێم بکرێت دەیکەم، ئەگەر ئەو دەرفەتەم هەبووایا وەکوو 2014 هەر ئێستا هێزم دەنارد.
- کۆبانێ ناوچەیەکی کوردییە و نابێت دەستی بۆ ببرێت.
- خۆت هەبیت پشتیوانیی خەڵکت هەیە، خۆت نەبیت پشتیوانیی خەڵکت نییە.
Facebook Comments Box
