نووسینگەی خامنەیی یەکەم ڕۆژی جەژنی ڕەمەزانی دیاری کرد

نووسینگەی خامنەیی پێشبینی دەکات، دووشەممەی داهاتوو یەکەم ڕۆژی جەژنی ڕەمەزان بێت. 

شەممە، 29-03-2025، نووسینگەی عەلی خامنەیی، ڕێبەری کۆماری ئێسلامیی ئێران، لە ڕاگەیەندراوێکدا باسی لەوە کرد، بە گوێرەی پێشبینی پسپۆڕان، سبەینێ یەکشەممە، 30-03-2025، تەواوکاریی مانگی ڕەمەزانە و دووسبەی دووشەممەش، 31-03-2025، سەرەتای مانگی شەوال و یەکەم ڕۆژی جەژنی پیرۆزی ڕەمەزان دەبێت. 

نووسینگەی خامنەیی ئاماژەی بەوەش کردووە، ئەمڕۆ ناتوانرێت بە هیچ شێوەیەک هیلال ببینرێت، بەڵام ئێوارەی سبەینێ یەکشەممە، 30-03-2025، دەتوانرێت زۆر بە ئاسانی هیلالی مانگی شەوال ببینرێت و بەو پێیەش دووسبەی دووشەممە، یەکەم ڕۆژی جەژنە. 

وا بڕیارە ئێوارەی ئەمڕۆ شەممە، 29-03-2025، لە هەرێمی کوردستان و زۆرینەی وڵاتانی ئیسلامی چاودێریی مانگ بکرێت بۆ دیاریکردنی یەکەم ڕۆژی جەژنی ڕەمەزان. 

مانگی ڕەمەزانی ئەمساڵ ڕۆژی شەممە، 01-03-2025، دەستی پێ کرد. لە هەرێمی کوردستانیش بە شێوەیەکی گشتی، هاووڵاتییان ئامادەکارییەکی زۆر باشیان کردووە و پێدوایستییەکانی ڕۆژانی جەژنیان کڕیوە. 

هاوکات ئیبراهیم عەبدولحەمید، گوتەبێژی دەستەی گەشتوگوزاری هەرێمی کوردستان ڕایگەیاند، بە باشترین شێوە پێشوازی لە گەشتیاران دەکەن و پێشبینی دەکەن، لە ڕۆژانی جەژن دەیان هەزار گەشتیار سەردانی شوێنە گەشتیارەکانی هەرێم بکەن.