پێشنیوەڕۆی ئەمڕۆ وەزارەتی دارایی و ئابووری هەرێمی کوردستان، داهاتی ناوخۆی بۆ مانگی چوار خستە سەر هەژماری بانکی لقی هەولێری بانکی ناوەندی عێراق.
ڕادەستکردنی 50%ـی داهاتی نانەوتی ناوخۆی هەرێمی کوردستان بە بەغدا، یەکێکە لە خاڵەکانی ڕێککەوتنی ئەمساڵ بۆ ناردنی مووچە، بۆ مانگی سێ نزیکەی 50 ملیار ڕادەستی بەغدا کرا.
سەرچاوەیەکی باڵا لە وەزارەتی دارایی و ئابووری هەرێمی کوردستان رایگەیاند، “بەشی گەنجینەی فیدراڵی لەداهاتی ناوخۆ هەرێم بۆ مانگی چوار خرایە سەر هەژماری لقی هەولێری بانکی ناوەندی و بڕەکەی 50 ملیار و 522 ملیۆن 750 دینارە.”
ل سەرچاوەیەک لە لقی هەولێری بانکی ناوەندی رایگەیاند، “بڕەکە خراوەتە سەر هەژماری بانکیمان”.
بەپێی ڕێكکەوتنی نێوان هەولێر و بەغدا، دەبێت هەرێمی کوردستان مانگانە 50%ـی داهاتی نانەوتی ڕادەستی بەغدا بکات، دوای هەموو 10ـی مانگێکیش دەبێت تەرازووی پێداچوونەوەی مانگی پێشتر ئامادەبکات و ڕەوانەی بەغدای بکات.
