هەسەدە لەبارەی هێرشەکەی سەر فڕۆکەخانەی عەربەتەوە راگەیاندراوێکی بڵاوکردەوە
فه‌رمانده‌یی گشتى هێزه‌كانى سوریاى دیموكرات “هەسەدە” لەبارەی هێرشەکەی سەر فڕۆکەخانەی عەربەتەوە راگەیاندراوێکی بڵاوکردەوە.
فه‌رمانده‌یی گشتى هێزه‌كانى سوریاى دیموكرات راگەیاندراوێکی بڵاوکردەوە و دەڵێت، “بەداخ و پەژارەیەکی زۆرەوە هەواڵی شەهیدبوونی کۆمەڵێک قارەمانی هێزەکانی دژەتیرۆرمان پێگەیشت لە ئەنجامی هێرشی دڕندانە بۆ سەر فڕۆکەخانەی ئەربەت لە شاری سلێمانی لە هەرێمی باشووری کوردستان. ئەم قارەمانانە کە بە خوێنی پاکی خۆیان ڕێگایەکی بەنرخی خەبات و قوربانیدانیان دامەزراند و گەل و نەتەوەی خۆیان پاراست”.
باس لە ئەوەشدەکات،”هەر لەو پێوەندییەدا فەرماندەیی گشتیی هێزەکانی سوریای دیموکرات پرسەو سەرەخۆشی لە فەرماندە و شەڕڤانانی هێزەکانی دژەتیرۆر و یەکێتی نیشتمانی کوردستان و کەسوکاری شەهیدان و هەموو گەلەکەمان دەکات. لەم ڕووداوە دڵتەزێنەدا هاوسۆزی تەواومان لەگەڵیان دەردەبڕین”.
هەسەدە دەڵێت،” گەلەکەمان هەمیشە شانازی بە قارەمانە قارەمانەکانی و دامەزراوە سەربازی و ئەمنییە بەهێزەکانیەوە دەکات کە دەتوانن بیپارێزن و چارەنووسی دوژمنان جگە لە شکست هیچی تر نابێت”.
ئەم ڕاگەیەنراوەش دوای ئەوەدێت، رۆژی 18-09-2023، بەدرۆن هێرش کرایە سەر فرۆکەخانەی کشتوکاڵی عەربەت.
فڕۆکەخانەی عەربەت، لە ساڵی 2005 کراوەتەوە. لە ساڵی 2007 بڕوانامەی رێپێدانی بۆ قەڵاچۆکردنی ئافاتە کشتوکاڵیەکانی بەدەستهێناوە، لە ساڵی 2017 وەکو سێیەم فڕۆکەخانەی هەرێمی کوردستان و حەوتەم فڕۆکەخانەی عێراق بەفەرمی ناسێنراوە. لە بوارەکانی کشتوکاڵی و راهێنانەکاندا سوودی لێ دەبینرێت.
