ژماره‌ی كوژراوانی غه‌ززه 12 هه‌زار كه‌سی تێپه‌ڕاند
لە دوایین ئاماری قوربانییاندا ڕاگەیاندنی حکومەتی غەززە ئاشكرای كرد، كه ژماره‌ی كوژراوان به‌هۆی بۆردومانه‌كانی سوپای ئیسڕائیل 12 هه‌زار كه‌سی تێپه‌ڕاند.
رۆژی هەینی 17/11/2023 ڕاگەیاندنی حکومەتی غەززە ڕایگەیاند: له 7ی ئۆكتۆبه‌ره‌وه تا ئێستا زیاتر له 12 هه‌زار كه‌س كوژراون، له‌و ژماره‌یه‌ش 5 هه‌زاریان منداڵن، له‌گه‌ڵ بێسه‌روشوێنبوونی زیاتر له 3750 كه‌سی تر.
ڕاشیگه‌یاند: تا ئێستا 25 نه‌خۆشخانه له غه‌ززه به‌ته‌واوی له‌كاركه‌وتوون له‌گه‌ڵ 52 بنكه‌ی ته‌ندروستی تر.
ئەمەش لەکاتێکدایە ئه‌مڕۆ 42 رۆژ تێپه‌ڕ ده‌بێت به‌سه‌ر واده‌ی ده‌ستپێكردنی شه‌ڕ و پێكدادانه‌كان له‌نێوان سوپای ئیسڕائیل و بزووتنه‌وه‌ی حه‌ماس، شه‌ڕ و ڕووبه‌ڕووبوونه‌وه‌كان ئێستا گه‌یشتوونه‌ته ناوه‌ڕاستی غه‌ززه، ماوه‌ی چه‌ندان رۆژیشه به‌هۆی بۆردومانه‌كانه‌وه ئاو و كاره‌با و تۆڕه‌كانی په‌یوه‌ندی پچڕاون و خه‌ڵك له دۆخێكی خراپدا ژیان به‌سه‌ر ده‌به‌ن.
