وەزیری پەروەردەی حكوومەتی هەرێمی كوردستان ڕایدەگەیەنێت، وەزارەتی پەروەردەی حکوومەتی هەرێمی کوردستان پێداگری لەسەر تەواوی مافەوە یاسایی و داراییەکانی مامۆستایانی هەرێمی کوردستان بە گشتی و فەرمانبەران دەکاتەوە، بەڵام ناکرێت بەهۆی پێنەدانی مووچە، یان دواکەوتنی مووچە پرۆسەی خوێندن و پەروەردە لە کوردستاندا پەکی بکەوێت.
ئەمڕۆ یەكشەممە 17/12/2023، لە ڕێوڕەسمی ڕۆژی ئاڵای كوردستاندا، ئالان حەمە سەعید، وەزیری پەروەردەی حكوومەتی هەرێمی کوردستان، لە لێدوانێکی تایبەتدا بۆ (باسنیوز) ئاماژەی بەوە كرد، ئەوان پێداگری لەسەر مافە یاسایی و دارایی و کارگێڕییەکانی تەواوی فەرمانبەرانی کوردستان و مامۆستایان دەکەنەوە، لەگەڵ حکوومەتی عێراقی و لایەنە پەیوەندیدارەکانیش بە بەردەوام لەسەر هێڵن و لە گفتوگۆدا بوون، بەڵام تا ئێستا هیچ ئەنجامێکی ئەوتۆ نەبووە تاوەکوو قسەی لەسەر بکرێت.
گوتیشی: “ئەوەی هەیە بریتییە لەو پارە و خەرجییانەی کە دەگاتە هەرێمی کوردستان و بەسەر تەواوی مووچەخۆرانی هەرێمی کوردستاندا دابەش دەکرێت بە مامۆستایانیشەوە، ناکرێت مامۆستایانی کوردستان ساڵێکی خوێندن بکەنە قوربانیی ئەم بابەتە.”
وەزیری پەروەردە باسی لەوەش كرد: “ئێستا چەند ڕۆژێک ماوە بۆ دەستپێکردنی تاقیکردنەوەکانی نیوەی ساڵی خوێندنی 2023 – 2024، لە کۆبوونەوەی بەردەوامداین بۆ چارەسەرکردنی ئەو گرفتە، بەڵام تا ئێستا بۆ ڕاگرتنی خوێندنی ئەمساڵ لە سەرانسەری هەرێمی کوردستاندا، هیچ بڕیارێک لە ئارادا نییە، بەڵکوو لە هەوڵداین بۆ چارەسەرکردنی ئەو گرفتە.”
