ئێوارەی ئەمڕۆ سێشەممە دەستەی گشتیی ناوچە کوردستانییەکانی دەرەوەی ئیدارەی هەرێم لە حكوومەتی هەرێمی كوردستان راگەیەندراوێكی بە بۆنەی كۆتاییهاتنی هەڵبژاردنی ئهنجوومهنی پارێزگاكان و بەشداریی کاریگەری دانیشتوان و کوردانی ناوچە کوردستانییەکان بڵاوكردەوە و رایگەیاند، “ئەم هەڵبژاردنە نەخشەی کوردستانی بە ئامانەتەوە گەیاندەوە چیای حەمرین”.
لە ڕاگەیەندراوەكەدا هاتووە: “بە بۆنەی سەرکەوتنی هەڵبژاردن و بەشداریی کاریگەری دانیشتوان و کوردانی ناوچە کوردستانییەکان و بەدەستهێنانی ڕێژەیەکی باشی دەنگ و کورسی لە ئەنجوومەنی پارێزگاکانی عێراق، پیرۆزبایی گەرمتان لێ دەکەین، ئەم ئەنجامانە کوردستانیبوونی ناوچەکان جارێکی تر کرد بە ڕاستی و هیچ دەرفەتێکی لە بەردەم ئەو جۆرە بیرکردنەوە و عەقڵە شۆڤێنییانە نەهێشتەوە کە هەمیشە بە پلان و ئەجندای جیاوازەوە لە هەوڵی تێکدانی ناسنامەی کوردستانیبوونی ئەو ناوچانەدا بوون.”
هەروەها دەڵێ: “ئێمە لە دوای دەرئەنجامەکانی هەڵبژاردن بە ئومێدێکی زۆرەوە چاوەڕوانی داهاتووی باشتر بۆ ناوچە کوردستانییەکانی دەرەوەی ئیدارەی هەرێم دەکەین و هیوادارین سەرکردایەتیی سیاسیی کوردستانیش بە دیدی هاوبەش و کاری پێکەوەیی خەبات بکەن لە پێناو پێکهێنانی حکوومەتی خۆجێیی لە تەوای ناوچەکان و بە یەکگرتوویی و خیتابێکی کوردستانی هەنگاوەکانی داهاتوویان بینا بکەن.”
هەروەها هیواخوازن ئەم ئەنجامانە کۆتایی بە تەعریبی نوێ و داگیرکاری ناڕەوا بهێنێت.
دەستەی گشتیی ناوچە کوردستانییەکانی دەرەوەی ئیدارەی هەرێم لە كۆتاییدا دەڵێ: “جارێکی تر پیرۆزبایی گەرمتان لێ دەکەین و ناسنامەی کوردستانیبوونی خۆتان لە وەهمی داگیرکەرانەوە گۆڕی بۆ ڕاستی مێژوویی و نەخشەی کوردستانتان بە ئامانەتەوە بردەوە چیای حەمرین.”
