سەرۆکوەزیرانی عێراق لەگەڵ جۆ بایدن کۆدەبێتەوە
وابڕیارە سەرلەبەیانیی ئەمڕۆ دووشەممە، محەمەد شیاع سودانی، سەرۆکوەزیرانی عێراق و جۆ بایدن، سەرۆکی ئەمریکا کۆببنەوە.
محەمەد شیاع سودانی، سەرۆکوەزیرانی عێراق، دوای گەیشتنی بە ئەمریکا، بڕیار وایە لە کۆشکی سپی لەگەڵ سەرۆکی ئەمریکا و ژمارەیەکی بەرپرسی ئەو وڵاتە کۆببێتەوە.
هەروەها لەسەردانەکەیدا لەگەڵ هەریەک لە برێت مەکگۆرک، نوێنەری تایبەتی ئەمریکا بۆ کاروباری رۆژهەڵاتی ناوەڕاست و باکووری ئەفریقا، ئەنتۆنی بلینکن، وەزیری دەرەوە و جەیک سولیڤان، راوێژکاری ئاسایشی نیشتمانیی ئەمریکا کۆدەبێتەوە.
سەرۆککوەزیرانی عێراق لەگەڵ بەرپرسانی ئابووری و بازرگانی، جێگری وەزیری گەنجینە و ژووری بازرگانیی ئەمریکا کۆدەبێتەوە و لەو کۆبوونەوانەدا باس لە دەرفەتە ئابوورییەکان و پرۆژەی گرنگ و کەرتی وزە لە پارێزگاکانی عێراق و هەرێمی کوردستاندا دەکرێت.
هاوکات، لە چوارچێوەی سەردانەکەیدا تاوتوێی بابەتی کشانەوە، یاخود مانەوەی هێزەکانی هاوپەیمانان لە عێراق و رێکخستنی چۆنییەتیی پەیوەندیی ئەو هێزانە و حکومەتی عێراق بەشێوەیەکی نوێ دەکرێت.
