بەمەبەستی پاراستنی ژینگە لەمەودوا لە هەولێر هاوشێوەی فەرەنسا و هۆلەندا پاسکیل بەکاردێت.
لێخوڕینی پایسکل یەکێکە لەو وەرزشانەی کە زۆر بە سوودە بۆ مرۆڤ لە هەر تەمەنێک بێت جگە لەمەش پایسکل بەکاردێت وەک یەکێک لە هۆکارەکانی گواستنەوە و بایەخی تایبەتی خۆی هەیە بۆ تەندروستی و لەش ساغی مرۆڤ بە شێوەیەکی گشتی.
رۆژی پێنجشەممە 11ـی 7ی 2024، به سه‌رپه‌رشتی ئومێد خۆشناو پارێزگاری هه‌ولێر و به ئاماده‌بوونی دكتۆر سه‌رباز شێخ نه‌جیب راوێژكاری سه‌رۆكوه‌زیرانی هەرێمی کوردستان و مه‌سعود كاڕه‌ش جێگری پارێزگار و قایمقامی قه‌زای ناوه‌ند و لایه‌نه په‌یوه‌ندیداره‌كانی شاره‌وانی، هاتووچۆ و ئه‌ندازه‌ی هاتووچۆ و ڕێگه و ژماره‌یه‌كی به‌رچاوی ئه‌ندازیاران، كۆبوونه‌وه‌یه‌كی فراوان بە ناونیشانی (به‌ره‌و هه‌ولێرێكی پایسكل دۆست)، كه تایبه‌ت بوو به پرۆژه‌ی دروستكردنی رێڕه‌وی پایسكلسواری له شاری هه‌ولێر، به‌ڕێوه‌چوو.
بەپێی ڕاگەیەندراوی پارێزگا، له كۆبوونه‌وه‌كه‌دا ته‌واوی پاڵپشتییه‌كانی سه‌رۆكوه‌زیران مه‌سرور بارزانی بۆ جێبه‌جێكردنی پڕۆژه‌كه خرایه‌ڕوو كه خزمه‌تێكی ته‌واو به ژینگه‌ی پارێزگای هه‌ولێر ده‌كات، هه‌روه‌ها كاریگه‌رییه‌كانی گۆڕانه‌كانی كه‌شوهه‌واش كه‌مده‌كاته‌وه و ڕێگه‌خۆشكه‌ریش ده‌بێت بۆ زیادكردنی رێژه‌ی سه‌وزایی و كه‌مكردنه‌وه‌ی ده‌ردانی گازه ژه‌هراوییه‌كان له ڕێگه‌ی ئۆتۆمبێل و هۆكاره‌كانی دیكه‌ی گواستنه‌وه.
پارێزگای هەولێر ئاماژە بەوەش دەکات، بۆ جێبه‌جێكردنی پڕۆژه‌كه، لیژنه‌یه‌كی تایمه‌تمه‌ند و ڕاوێژكاریی ئه‌ندازیاریی له پارێزگای هه‌ولێر پێكهێندراوه، لێژنه‌كه ورده‌كاری چۆنییه‌تی جێبه‌جێكردنی پڕۆژه‌كه‌ی ئاماده كردووه و له كۆبوونه‌وه‌كه‌ی ئه‌مڕۆ له ڕێگه‌ی سیمینارێكه‌وه گفتوگۆی زیاتری له‌باره‌وە کرا و شرۆڤه‌ی ته‌واوی لایه‌نه‌كانی كرا.
داواشكرا، سوود له ئه‌زموونی پاریس وه‌ك ده‌سته‌خوشكی شاری هه‌ولێر و هۆڵه‌ندا وه‌ك وڵاتی پێشه‌نگ له به‌كارهێنانی پایسكل وه‌ربگیرێت.
ئه‌وه‌شیان ڕوونكرده‌وه، شاری هه‌ولێر وه‌ك شارێكی بازنه‌یی، له‌باره بۆ جێبه‌جێكردنی پرۆژه‌ی دروستكردنی رێڕه‌وی پایسكلسواری، له‌كاتی ته‌واوبوونی ئاماده‌كارییه‌كان و وه‌رگرتنی سه‌رنج و روونكردنه‌وه‌كان، پڕۆژه‌كه جێبه‌جێ ده‌كرێت.
