دواین زانیاری لەبارەی هێرشەکەی ئیسرائیل بۆسەر ئێران

-سوپای ئیسرائیل: (20) پێگەمان لەناو ئێران كردووەتە ئامانج “كارگەی دروستكردنی موشەك و فرۆكەی بێفرۆكەوان بوون”
-ئەكسیۆس: ئیسرائیل پێشتر ئێرانی ئاگاداركردووە لە هێرشەكەی”بۆ ئەوەی جەنگ لە ناوچەكە تەشەنە نەسێنێت”
-تەسنیم: بانگەشەكانی ئیسرائیل بە كردنە ئامانجی (20) پێگە جەنگی دەرونییە “چەند ناوچەویەك لە دەرەوەی سنور كراونەتە ئامانج و زیانەكانی سنوردار بووە”

كاتژمێری (5) بەیانی ئەمڕۆ، فرۆكە جەنگییەكانی سوپای ئیسرائیل هێرشێكی ئاسمانی فراوانیان كردە سەر ئێران.
سوپای ئیسرائیل رایگەیاند: گورزی وردیان وەشاندووە لەچەند ئامانجێكی سەربازی لە چەند ناوچەیەكی ئێران، كە كارگەی دروستكردنی موشەكی بوون و كە هێرشەكانی سەر ئیسرائیلدا بەكارهێنراون.
سوپای ئیسرائیل ئاماژەی بەوەشكرد: موشەكی زەمین بە ئاسمان و تواناكانی ئێران لە فرۆكەی بێفركەوانیش كراونەتە ئامانج، گورزەكەش لەوەڵامی هێرشە موشەكییەی تاراندا بووە بۆ سەر ئیسرائیل.
لەوباریەوە، رۆژنامەی نیویۆرك تایمز بڵاویكردەوە، پرۆسە سەربازییەكەی ئیسرائیل بۆ سەر ئێران كۆتایهاتووە دوای كردە ئامانجی نزیكەی (20) پێگە.
هاوكات پێگەی ئەكسیۆس بڵاویكردەوە: هێرشەكەی ئیسرائیل سێ‌ شەپۆل بووە، لە شەپۆلی دووەم و سێیەمدا سەكۆ موشەكییەكان و فرۆكەی بێفركەوانی كردووەتە ئامانج.
پێگە ئەمریكییەكە ئەوەشی ئاشكراكردووە، ئیسرائیل رۆژی هەینی پەیامی ناردووە بۆ ئێرانییەكان و ئاگاداری كردوونەتەوە لە هێرشەكەی، هۆشدارییەكەی ئیسرائیل بۆ ئەوە بووە سنورێك بۆ هێرشكردنە سەر یەكتر دابنێت و، رێگە لە ئاڵۆزبونی زیاتری دۆخەكە بگرێت.
لەیەكەم لێدوانی فەرمیدا لەبارەی هێرشەكانی ئیسرائیل، هێزی بەرگری ئاسمانی ئێران راگەیاند: روبەڕوی هەوڵەكانی ئیسرائیل بونەتەوە بۆ هێرشكردنە سەر چەند ناوچەیەكی ئێران.
هاوكات فرۆكەوانی مەدەنی ئێران، تەواوی گەشتە ئاسمانییەكانی لەوڵاتەكەی راگرت تا كاتێكی نادیار.
هەر لەو چوارچێوەیەدا ئاژانسی هەواڵی تەسنیمی ئێرانی لەزاری سەرچاوەیەكی ئاگادارەوە بڵاویكردەوە، بانگەشەكانی ئیسرائیل بە كردنە ئامانجی (20) خاڵ لە ئێران راست نییەو دەچێتە چوارچێوەی جەنگی دەرونییەوە.
جەختبشكردووە لەوەی، دوژمنكاری زایۆنی لە دەرەوەی سنوری ئێران بووەو زیانەكانی سنوردار بوون.