پارتی چوار مەرجی بۆ یەکێتی و هەر لایەنێک هەیە بەشداری لە کابینەی نوێی حکومەت بکات، بەڵام یەکێتی جیاواز بیردەکاتەوە و داواکاری هەیە، بەجۆرێک وەرگرتنی ئیمتیازاتی دارایی و پۆستەکانی بەلاوە گرنگە.
دوای ڕاگەیاندنی ئەنجامی کۆتایی هەڵبژاردن و یەکلابوونەوەی دەنگ و کورسی لایەنەکان، دوو حیزبە گەورەکەی کوردستان، پارتی و یەکێتی وەرەقەی دانوستان ئامادە دەکەن، مەرج و داواکارییەکان دەنووسنەوە و ڕاشکاوانە لەسەر مێزی گفتوگۆ قسەی لەسەر دەکەن.
پارتی چوار مەرجی بۆ یەکێتی و هەر لایەنێک ئەوەیە بێتە ناو حکومەت:
یەکەم: یەک حکومەتی یەکگرتوو و سەرتاسەری هەبێت لە زاخۆوە تاوەکو کەلار و کفری، بڕیارەکانی بێ کێشە و گرفت جێبەجێ بکرێن نەوەک لە هەندێک شوێن ڕێگری لێ بکرێت.
دووەم: یەک هێزی پێشمەرگە هەبێت، ببێتە هێزێکی نیشتمانی و لە ململانێی حیزبی دابماڵرێت.
سێیەم: یەک قەوارە، مەبەستی پارتی ئەوەیە سەرجەم حیزب و لایەنەکان کار بۆ پاراستنی قەوارەی هەرێمی کوردستان بکەن، لە پرسە نیشتمانییەکان یەک دەنگ و یەک هەڵوێست بن و هەموویان پێکەوە خزمەت بە بەرژوەندییە باڵاکانی گەلی کوردستان بکەن.
چوارەم: لە خولی نوێی پەرلەمان کار بۆ هەموارکردنی ڕەشنووسی دەستوور و تێپەڕاندنی بکرێت و هەرێمی کوردستان ببێتە خاوەن دەستووری خۆی.
هەر ئەمرۆ سەرۆکوەزیران مەسروور بارزانی، لەبارەی پێکهێنانی حکومەت یەکەم پەیامی بۆ ئەو لایەنە سیاسییانە نارد کە دەیانەوێت بەشداری لە حکومەت بکەن و گوتی: “هەر کەسێک بیەوێت بەشداربێت، دەبێت وەڵامدەرەوەی ویست و خواستی خەڵک بێت”.
لەبەرامبەردا، یەکێتی لە گۆشەیەکی دیکەوە لە پێکهێنانی حکومەت دەڕوانێت و جیاواز لە پارتی بیردەکاتەوە، بەجۆرێک وەرگرتنی ئیمتیازاتی دارایی و سەربازی و پۆستەکانی بەلاوە گرنگە، ئاڤا زانیویەتی یەکێتی ئەوەندی بتوانێت پێداگری لەسەر وەرگرتنی پۆستە باڵاکان دەکات بەتایبەت لە هەرسێ سەرۆکایەتییەکە، سەرۆکایەتیی هەرێم، سەرۆکایەتیی حکومەت، سەرۆکایەتیی پەرلەمان لەگەڵ ئەنجوومەنی باڵای دادوەری.
ئاڤا
