لە دوای هەڵبژاردنەکانی پەرلەمانی کوردستان شاندی دانوسانکاری نێوان پارتی و یەکێتیی دووجار کۆبوونەتەوە، ئەمەش جگە لە دووجار کۆبوونەوەی شاندی تەکنیکی نێوان هەردوولا.
هۆشیار زێباری، ئەندامی دەستەی کارگێڕیی مەکتەبی سیاسیی پارتی لە هەژماری فەرمی خۆی لەسەر تۆڕی (X) هەواڵی کۆبوونەوەکەی بڵاوکردوەتەوە و نووسیوەیەتی، “کۆبوونەوەی دوێنێی نێوان سەرۆکوەزیران مەسرور بارزانی و بافڵ تاڵەبانیی، سەرۆکی یەکێتیی نیشتیمانیی کوردستان، زۆر بە ئارامیی بەڕێوەچوو و گفتوگۆی ڕاشکاوانە و بونیاتنەرانە کرا، هاوتەریب بوو لەگەڵ پڕۆسەی دانوستانەکانی نێوان پارتی و یەکێتی بۆ هەرچی زوو پێکهێنانی کابینەی نوێی حکومەتی هەرێمی کوردستانە”.
چاوەڕێ دەکرێت کۆبوونەوەی نێوان سەرۆکوەزیران مەسرور بارزانی و بافڵ تاڵەبانی هۆکارێکی کاریگەر بێت بۆ هەرچی زووە پێکهێنانی کابینەی دەیەمی حکومەتی هەرێمی کوردستان. ئەمەش دوای کەمتر لە سێ مانگ لە بەڕێوەچوونی خولی شەشەمی پەرلەمانی کوردستان دێت.
