سەرۆکی دەستەی وەبەرھێنان رایده‌گه‌ێنێت، ھەنگاوەکان بۆ راکێشانی بۆری غازی ماڵان دەستیپێکردووە و بۆرییەکە بۆ ھەموو ماڵێک رادەکێشن، بەبێ ئەوەی ھیچ تێچووێکی لەسەر ھاووڵاتییان هەبێت.
بەگوێرەی گوتەکانی سەرۆکی دەستەی وەبەرھێنان، سیستەمی غاز لە هەرێمی کوردستان وەکو وڵاتانی دیکەی لێ دێت و بە قۆناخ لەلایەن کۆمپانیای ناوخۆیی و بیانی، جێبەجێدەکرێت و چەندین پڕۆژە لەخۆ دەگرێت. لەهەمانکاتیشدا لە شار و شارۆچکەکان عەمباری غاز دروستدەکرێن.
باسی لەوەشکردووه: ئەو پرۆسەیە کاتی دەوێت و کار دەکەین زەوی بۆ عەمبارەکان تەرخانبکرێت، ھەوڵدەدەین ئەمساڵ پرۆژەکە دەستپێبکات، چونکە خەرجیی زۆر و کاتی زۆریشی دەوێت.
سەرۆکی دەستەی وەبەرهێنان، ئەوەشی خستۆتەڕوو: دروستکردن و راکێشانی بۆری غاز بۆ ماڵان، ھیچ تێچوویه‌کی لەسەر ھاووڵاتییان نابێت و غازیش گران نابێت، تەنھا پارەی ئەو غازە دەدەن کە بەکاریدەهێنن.
پرۆژەی راکێشانی بۆڕی غاز بۆ ماڵان، لەلایەن دەستەی وەبەرهێنانەوە پێشنیار کراوە و سەرپەرشتی دەکرێت، بەپێی پلانەکە سیستمی غاز لە هەرێمی کوردستان دەگۆڕدرێت و چیدی هاووڵاتییان پێویست ناکات بە بووتڵ غاز بکڕن، بە بۆڕیی بۆیان دەچێتە ماڵەوە، تەنها پارەی ئەو بڕە غازەش دەدەن کە بەکاریدەهێنن.
