بەرپرسێكی وەزارەتی بازرگانیی هەرێمی كوردستان ئاشكرای دەكات، لەڕێگەی بە ئەلیكترۆنیكردنی پسوولەی خۆراك، سەرجەم ئەو ناوانە لە سیستم دەردەهێنرێن كە لە دەرەوەی وڵاتن یان دووبارەن یانیش نایاسایی و بێگانەن، لەبەرامبەریشدا جۆر و بڕی بەشەخۆراك باشتر و زیاتر دەكرێت.
سەروەر هاواری، بریكاری وەزارەتی بازرگانی و پیشەسازیی هەرێمی كوردستان ڕایگەیاند، ئاژانسە نێودەوڵەتییەكان هاوكارمانن لە جێبەجێكردنی پرۆسەی بە ئەلیكترۆنیكردنی پسوولەی خۆراك، پرۆسەكە بەردەوامە و سەرەتای مانگی داهاتوو كۆتایی بەو وادەیە دێت كە دراوە بە هاووڵاتیان بۆ ئەوەی خۆیان لە سیستمەكە تۆمار بكەن، ئامانج لە پرۆسەكە باشتركردنی جۆر و بڕی بەشەخۆراكی مانگانەی هاووڵاتیانە.
-لە گفتوگۆكانمان لەگەڵ وەزارەتی بازرگانیی عێراق باسی ئەوە كراوە كە یەكێك لە ئامانجەكانی بە ئەلیكترۆنیكردنی پسوولەی خۆراك، ئەوەیە كە ناوی زیادە و دووبارە و نایاسایی و بێگانە لە سیستمەكە دەربهێندرێت و لەبەرامبەردا لە بودجەی وڵات بڕە پارەیەكی زیاتر دابین بكرێت و لەو ڕێگەیەوە جۆر و بڕی بەشەخۆراكەكان باشتر و زیاتر بكات، بۆ نموونە ئێستا ئەگەر حەوت جۆر خۆراك دابەش بكرێت، هەوڵەكە بۆ ئەوەیە لە داهاتوودا چەند جۆرێكی دیكەی خۆراك كە پێویستن بۆ ژیانی هاووڵاتیان زیاد بکرێن و دابەش بكرێن.
لە ساڵی 2024 نۆ بەشەخۆراك و نۆ بەشەئارد دراوە بە هەر خێزانێك كە پسوولەی خۆراكی هەبێت، كە ئەمەش هاوسەنگیی نرخ لە بازاڕ ڕادەگرێت و كاریگەریی ڕاستەوخۆی بۆ ڕێگریكردن لە بەرزبوونەوەی نرخی خۆراكە سەرەكییەكان هەیە.
