پارێزگاری سلێمانی له‌باره‌ی تاپۆكردنی زه‌وی وه‌ڵامی سۆران عومه‌ر ده‌داته‌وه رای ده‌گه‌یه‌نێت، نه‌خه‌مڵاندنیان بۆ كردووه نه تاپۆیانكردووه، تەنیا یاساییانەو کارگێڕییانە وەڵامی پرسیاری لیژنەی باڵای تەملیککردنی خانووە حکومییەکانمان داوەتەوە”.
هه‌ڤاڵ ئه‌بوبه‌كر پارێزگاری سلێمانی له‌باره‌ی تاپۆكردنی زه‌ویی له لایه‌ن ئه‌وانه‌وه وه‌ڵامی سۆران عومه‌ر ئه‌ندامی په‌رله‌مانی عێراق ده‌داته‌وه و ده‌ڵێت،”نە خەمڵاندنمان کردووە، نە تاپۆمانکردووە، تەنیا یاساییانەو کارگێڕییانە وەڵامی پرسیاری لیژنەی باڵای تەملیککردنی خانووە حکومییەکانمان داوەتەوە”.
ئاماژه بۆ ئه‌وه‌یش ده‌كات “لەم ماوەیەدا یەك، دوو؛ پەرلەمانتاری پەرلەمانی كوردستان و ئەنجومەنی نوێنەرانی عیراق، بێ بەڵگە و ناڕەوایانە، دەیانەوێت پارێزگاری سلێمانی ئێسته، كە تەنیا پارێزگاری كوردستان و عێراقە لەڕێی دەنگی ڕەوای خەڵكەوە هەڵبژێردراوە، كار بۆ خزمەت، نەك دەستكەوت، بۆ حكومەتی هاووڵاتیی، نەك حیزبیی، دەكات.
ده‌قی روونكردنه‌وه‌كه‌ی پارێزگاری سلێمانی
(ئێمە؛ نە خەمڵاندنمان کردووە، نە تاپۆمانکردووە، تەنها یاساییانەو کارگێڕییانە؛ وەڵامی پرسیاری لیژنەی باڵای تەملیککردنی خانووە حکومییەکانمان داوەتەوە)
لەم ماوەیەدا یەك، دوو؛ پەرلەمانتاری پەرلەمانی كوردستان و ئەنجومەنی نوێنەرانی عیراق، بێبەڵگەو ناڕەوایانە، دەیانەوێت پارێزگاری سلێمانی ئێستا، كە تەنها پارێزگاری كوردستان و عیراقە لەڕێی دەنگی ڕەوای خەڵكەوە هەڵبژێردراوەو؛ كار بۆ خزمەت، نەك دەسكەوت، بۆ حكومەتی هاووڵاتیی، نەك حیزبیی؛ دەكات، لەبەردەم ڕای گشتیدا بئاڵێننە ئەو كارە نایاسایی و ناكارگێڕیی و ناڕەواو چەتەگەرییانەی، كە وڵاتەكەی تێدا نغرۆكراوە، هەموو هاووڵاتیانی خۆشەویست دڵنیادەكەینەوە، كە ئێمە دورین و دوردەبین لە هەر كارێكی نایاسایی و هەر بەرژەوەندییەكی تایبەتیی و حیزبیی و، هەر زیادكردنێكی شاراوەو ئاشكرای بازرگانیكردن بە: داوا ڕەواكانی خەڵك و دەنگ و ڕەنگ و سەنگ و خوێن و ئیرادەو تێكۆشان و هەڵوێست و بڕیاریانەوە.
لە هەوڵێكی تری لەم جۆرەدا، پارێزگاری سلێمانی ئێستا تاوانباردەكەن بە؛ تاپۆكردنی موڵكێكی پارێزگای سلێمانی، لەسەر بەڕێز (رەوف مەلیك موزەفەر)، لێرەوە بەهەموو لایەكی ڕادەگەیەنین:
1- ئەم موڵكە؛ لە پاشماوەی خانووی ئەمنەكانی سەردەمی ڕژێمی ڕوخاو بووە، كە لە ڕاپەڕینەوە كەوتنە دەست خەڵكی تێكۆشەرو ڕاپەڕیوی سلێمانی، ناوبراو تیایدا نیشتەجێ بووەو دواتر ئەم موڵکە لە ١٤ی شوباتی ٢٠١٠دا، تۆمارکراوە بەناوی پارێزگای سلێمانییەوە، بەپێی بڕیاری ژمارە (١٩٦)ی ڕۆژی ١٤ی شوباتی ٢٠١٠ ی دەستەی چارەسەرکردنی کێشەی موڵکداریی خانووبەرەوە.
لە (30/8/2010)وە بەڕەسمیی داوا لە پارێزگاری ئەوكاتەی سلێمانی كراوە، كە ئەم موڵكە بەكرێ تەرخان بكات بۆ نیشتەجێی خانووەكە بەڕێز (ملازمی یەك/ رەوف مەلیك موزەفەر) تا بەپێی ڕێنمایی ژمارە (5224) لە (26/3/2008)دا كرێی مانگانەی لێوەربگیرێت. پارێزگاری ئەوكاتەی سلێمانی بە فەرمانی كارگێڕییان بە ژمارە (28/1/4118) لە (14/2/2011)دا فەرمانی تەرخانكردنی بەكرێ؛ داوە.
2- ئەم هاووڵاتییە وەك هەر هاووڵاتییەكی نیشتەجێی خانوو و موڵكە حكومییەكان، هەوڵی بەردەوامی داوە بۆ تاپۆكردنی ئەم موڵكە لەسەرخۆی و هەموو ڕێكارێكی یاسایی و كارگێڕیی گرتۆتەبەر و دۆسیەیەكی زیاترلە (600) لاپەڕەیی ئەم بابەتە لە بەشی موڵكایەتیی پارێزگامان پارێزراوە، لەگەڵ ئەوەی نە خۆی و نە خێزانی سودمەند نەبوون لە وەرگرتنی هیچ موڵكێكی نیشتەجێبوون، بەڵام هەمیشە داواكە لەلایەن پارێزگامان و بەڕێوەبەرێتیی خانووبەرەی میری سلێمانییەوە ڕەتكراوەتەوە، چونكە خاوەندارێتییەكەی لە (2010)وە خراوەتە سەر پارێزگامان.
3- بۆ جاری كۆتایی ئەم داوایە خراوەتە بەردەم لیژنەی باڵای تەملیككردنی خانووە حكومییەكانی حكومەتی هەرێمی كوردستان، كە بەڕێز وەزیری دارایی سەرۆكایەتیی دەكات بە ئەندامێتیی هەریەك لە بەڕێوەبەرە گشتییەكانی تۆماركردنی خانووبەرە، باجەكان و خانووبەرەی میری، كارگێڕی و خۆیەتیی وەزارەتی ناوخۆ، بە نوسراویان ژمارە (5053)ی (8/12/2020) وەك هەموو ئەوشوێنانەی ئەم نووسراوەیان بۆ ڕۆشتووە، داوایان لێكردووین ئایا ناوبراوی ناو ئەم نوسراوەو نیشتەجێی ئەم موڵكە، یان خێزانەكەی سودمەندبوون لە وەرگرتنی موڵكی حكومیی یان نا؟ ئێمەیش نووسراومان كردووە بۆ هەموو فەرمانگاو یەكە كارگێڕییە پەیوەندیدارەكانی سنوری پارێزگای سلێمانی و بەنوسراوی فەرمیی، هەموویان وەڵامیان داوینەتەوە كە سودمەندنەبوون و ئەم وەڵامەو هاوپێچەكانیمان، ئاراستەی لیژنەی باڵای تەملیككردن كردووە، بەپێی یاساو ڕێنماییەكان؛ بێ ئەوەی داوای تەملیككردن یان ڕەزامەندیی تەملیككردنیمان دابێت.
4-بەهیچ جۆرێك پارێزگاری سلێمانی دەسەڵاتی تاپۆكردنی زەوی و موڵك و ماڵی نییە، ئەم موڵکە بەپێی بڕیاری ژمارە (48)ی ڕۆژی (29/11/2021)ی لیژنەی باڵای تەملیككردنی خانووە حكومییەكان؛ بڕیاری تەملیككردنی بۆدراوەو تەنها وێنە دراوە بە پارێزگای سلێمانی بۆ ئاگاداری و بەپێی یاسا لیژنەی باڵا لایەنی بڕیاردەرە لە هەر بابەتێكی لەم شێوەیەدا.
5-خەمڵاندنی ئەم موڵكە بەپێی ڕێنمایی تەملیككردنی خانووە حكومییەكانی ساڵی (2004) كراوە، لە ڕۆژی (14/6/2011)دا بە واژۆی سەرۆكی لیژنەی فەرعی تەملیككردنی خانووە حكومییەكانەوە ئەو بڕە دیاریكراوەو بە نوسراوی ژمارە (14955) لە (14/6/2011)دا بەفەرمیی ئاراستەی لیژنەی باڵای تەملیككردنی خانووە حكومییەكان كراوەو لە بڕیاری ژمارە (48)ی ڕۆژی (29/11/2021) لەلایەن لیژنەی باڵاوە پەسەندكراوەو هیچ پەیوەندیی بە پارێزگاری ئێستای سلێمانییەوە نییە.
پارێزگامان بەفەرمیی ڕێكاری یاسایی پێویست بەرامبەر هەركەس و لایەنێك دەگرێتەبەر، كە بەبێ بەڵگە هەوڵی دروستكردنی تۆمەت و ناوزڕاندنی پارێزگار یان هەر بەڕێوەبەرو فەرمانبەرێكی دەوڵەتیی، یان لەكەداركردنی ئەم دامەزراوە هەڵبژێردراوە بدات.
لێرەوە داوا لە فەرمانگەی داواكاری گشتیی پارێزگای سلێمانی دەكەین، كە لەپێناوی دەرخستنی ڕاستییەكان و ئاراستەكردنی ئەوكەسانەی ئارامیی خەڵك و ئاسایش و ئاشتیی كۆمەڵایەتیی و متمانەی دامەزراوە دەوڵەتییەكان و نەزمی گشتیی دەخەنە ژێر مەترسییەوە، ڕێكاری یاسایی پێویست بگرێتەبەرو، پارێزگای سلێمانیش ئامادەیە وەك هەمیشە نووسراو و بەڵگەو بڕیارەكان بخاتە بەردەست و ئامادەین بۆ هەر لێپرسینەوەیەك.
هەمیشە دەرگای پارێزگامان کراوەیە بۆ هەر کەس و پەرلەمانتارو دامەزراوەیەکی بەڕێز، کە بە خەمی بنکۆڵکردن و زانینی ڕاستییەکان و بەدواداچونی یاساییانەی هەر دۆسییەیەکەوە بێت، لە پێناوی لێرسینەوەو زانین و چاودێریکردن و وردبینیکردن و چارەسەرکردن و ڕێگریکردن لە کاری نایاسایی و گەندەڵکاریدا، یەکەم دامەزراوەی جێبەجێکردنیش بوین کە هۆبەی زانیاریپێدانمان بەر لە هەموو شوێنەکانی تر کردۆتەوە.
