بەهۆی تەقینەوەیەک لە تورکیا حەوت کەس گیانیان لە دەست دا

تەقینەوەیەک لە رێستۆرانتێکی پارێزگای ئایدن لە باشوری خۆرئاوای تورکیا روویدا و بەهۆیەوە حەوت کەس گیانیان لەدەستدا و چواری دیکەش برینداربوون.

حوسێن ئاکسۆی پارێزگاری ئایدن بە ئاژانسی فەرمی هەواڵی ئانادۆڵۆی رایگەیاند، لە تەقینەوەیەکدا کە لە چێشتخانەیەک لە شارۆچکەی نازیللی سەربە پارێزگای ئایدن روویداوە، حەوت کەس گیانیان لەدەستداوە و چواری دیکەش برینداربوون کە برینی یەکێکیان سەختە.

ئاماژەی بەوەشداوە، لە چێشتخانەیەکی شەقامی قوبرس لە گەڕەکی ئاڵتنتاش زانیارییان پێگەیشتووە کە لە کاتی گۆڕینی بوتڵی غازدا تەقینەوەیەک روویداوە و تاوەکو ئێستاش کارەکانی تیمەکانیان لەو ناوچەیە بەردەوامە.

باسی لەوەشکرد، لێکۆڵێنەوەکان لە رووداوەکە دەستی پێکردوووە، بەڵام بەپێێ زانیارییە سەرەتاییەکان تەقینەوەکە بەهۆی بتڵی غازەوە بووە.

میدیا مەگەزین