لێپرسینەوە لەگەڵ محەمەد شیاع سودانی دەکرێت لەلایەن هاوپه‌یمانی ده‌وڵه‌تی یاسا
هاوپه‌یمانی ده‌وڵه‌تی یاسا له‌باره‌ی لێدوانه‌كانی سوودانی بۆ ده‌ربڕینی پشتیوانی له مانه‌وه‌ی هێزه‌كانی هاوپه‌یمانان له عێراق هاته‌ده‌نگ و داوای لێپرسینه‌وه‌ی لێده‌كات.
له‌لایه‌ن خۆیه‌وه، ئه‌ندامێكی كوتله‌ی هاوپه‌یمانی ده‌وڵه‌تی یاسا له ئه‌نجوومه‌نی نوێنه‌رانی عێراق پشتڕاستی لێدوانه‌كانی محه‌ممه‌د شیاع سوودانی، سه‌رۆك وه‌زیرانی عێراقی كرده‌وه له‌باره‌ی مانه‌وه‌ی هێزه‌كانی ناتۆ و ئه‌مه‌ریكا له عێراق و جه‌ختی له‌سه‌ر ئه‌وه‌شكرده‌وه، له‌سه‌ر ئه‌و هه‌ڵوێسته‌ی لێپرسینه‌وه‌ی له‌گه‌ڵدا ده‌كرێت.
ئه‌مڕۆ دووشه‌ممه (16ـی كانوونی دووه‌م/یه‌نایری 2023)، محه‌ممه‌د سه‌عدون، ئه‌ندامی هاوپه‌یمانی ده‌وڵه‌تی یاسا كه له‌لایه‌ن نوری مالیكییه‌وه سه‌ركردایه‌تی ده‌كرێت، رایگه‌یاند، هه‌ڵوێستی محه‌ممه‌د شیاع سوودانی، سه‌رۆك وه‌زیرانی عێراق له‌باره‌ی مانه‌وه‌ی هێزه بیانییه‌كان له عێراق فه‌رمییه و هه‌موو لایه‌نه‌كان له‌سه‌ر ئه‌و هه‌ڵوێسته‌ی لێپرسینه‌وه‌ی له‌گه‌ڵدا ده‌كه‌ن.
ئه‌و ئه‌ندامه‌ی ئه‌نجوومه‌نی نوێنه‌رانی عێراق ئاماژه‌ی به‌وه‌شدا، پێویسته حكومه‌ت و ته‌واوی لایه‌نه سیاسییه‌كان ملكه‌چی بڕیاره‌كانی ئه‌نجوومه‌نی نوێنه‌رانی عێراق بن، له‌باره‌ی جێهێشتنی خاكی عێراق له‌لایه‌ن هێزه بیانییه‌كانه‌وه.
ئه‌مه‌ش له كاتێكدایه، له چاوپێكه‌وتنێكدا له‌گه‌ڵ رۆژنامه‌ی وۆڵ ستریت جۆرناڵ كه رۆژی (15ـی كانوونی دووه‌م/یه‌نایری 2023) بڵاوكرایه‌وه، محه‌ممه‌د شیاع سوودانی، سه‌رۆك وه‌زیرانی عێراق رایگه‌یاند، هیچ كاتێك بۆ كشانه‌وه‌ی هێزه‌كانی هاوپه‌یمانان له عێراق دیارینه‌كراوه و عێراق پێویستی به مانه‌وه‌ی ئه‌و هێزانه‌یه بۆ له‌ناوبردنی یه‌كجاری داعش.
ئه‌م لێدوانانه‌ی سه‌رۆك وه‌زیرانی عێراق بۆ یه‌كه‌مجاره به‌شێوه‌یه‌كی راشكاوانه له كابینه‌ی نوێی حكومه‌تی عێراق له‌باره‌ی به‌رگریكردن له مانه‌وه‌ی هێزەکانی ئەمریکا و ناتۆ لە عێراق تا کاتیکی نادیار ئاماژه‌ی پێبكرێت.
محەممەد شیاع سوودانی ئاماژه‌ی به‌وه‌شكردووه، هەڕەشە و هێرشی چەکدارانی داعش لە سووریاوە بۆ ناو سنووری ناوچه‌كانی عێراق به‌رده‌وامه، بۆیه هێزه ئه‌منییه‌كانی عێراق تاوه‌كو ئێستا پێویستیان به پاڵپشتی، راوێژ و راهێنانی هێزه‌كانی هاوپه‌یمانانه.
له‌باره‌ی په‌یوه‌ندییه‌كانی نێوان عێراق و ئه‌مه‌ریكا، سوودانی باسی له‌وه‌شكردووه، كابینه‌كه‌ی دەیەوێت بە هەمانشێوەی سعوودیە و وڵاتانی کەنداو سوود لە پەیوەندییەکانیان لەگەڵ ئەمه‌ریکا وەربگرن، هه‌روه‌ها دەشکرێت لەیەککاتدا لەگەڵ ئێران و ئەمه‌ریکا پەیوەندییەکی باشیان هەبێت.
هه‌ر لەو چاوپێکەوتنه‌دا لەگەڵ رۆژنامەی وۆڵ ستریت جۆرناڵ، سەرۆک وەزیرانی عێراق روونیكردووه‌ته‌وه، جۆ بایدن، سه‌رۆكی ئێستای ئه‌مه‌ریكا لە سەرۆکەکانی پێش خۆی جیاوازە و لەهەمووان زیاتر شارەزای عێراقە، دەکرێت ئەمه بكرێته بنه‌مای پەیوەندییەكی زۆر باش له‌نێوان به‌غدا و واشنتن.
میدیا مەگەزین
