یاریده‌ده‌ری ئه‌مینداری گشتی نه‌ته‌وه یه‌كگرتووه‌كان بۆ كاروباری مرۆڤ، مارتن گریفت، رایگه‌یاند: بوومه‌له‌رزه‌كه‌ی توركیا و سووریا کە چقی بوومەلەرزەکە شاری مەڕەش بوو، بووه هۆی گیانله‌ده‌ستدانی زیاتر لە 28 هەزار کەس.
ئه‌مڕۆ یه‌كشه‌ممه(12شوباتی 2023) مارتن گریفت، لە تویتێکدا ئاماژەی بەوەداوە: خه‌ڵكی سووریا مافی خۆیانه واهه‌ست بكه‌ن ئێوه وازتان لێهێناون، ئه‌وان چاوه‌ڕوانی هاوكارییه‌كانن و به‌ده‌ستیان نه‌گه‌یشتووه، ده‌بێت به‌خێراترین كات ئه‌وكاره راست بكرێته‌وه.
یاریده‌ده‌ری ئه‌مینداری گشتی نه‌ته‌وه یه‌كگرتووه‌كان بۆ كاروباری مرۆڤ، گوتی: كۆمه‌ڵگه‌ی نێوده‌وڵه‌تی شكستی هێناوه، كه تاوه‌كو ئێستا خه‌ڵكی باكووری رۆژئاوای سوریا، واهه‌ست ده‌كه‌ن به‌جێهێڵراون بۆ چاره‌نووسی خۆیان و هاوكاری ناكرێن.
گریفت، ئاماژه‌ی به‌وه‌شكرد: ئێستا له سنووری نێوان توركیا و سووریادا ده‌گه‌ڕێم به دوای هاوكارییه نێوده‌وڵه‌تیه‌كان، به‌ڵام هیچ شتێك نه‌گه‌یشتووەته سووریا.
ده‌شڵێت: ئه‌ركی منه ئه‌و هه‌ڵە‌یه راست بكه‌مه‌وه به‌خێراترین كات، ئه‌وانیش پێویستیان به هاوكاری نێوده‌وڵه‌تییه.
میدیا مەگەزین
