بەرەبەیانی ئەمڕۆ 20/8/2023 لە یاریی کۆتایی جامی خولەکاندا، یانەی ئینتەرمەیامی لە ناشڤیڵ کە بە کوردستانی بچووک ناسراوە، بەرامبەر یانەی ناشڤیڵ یارییکرد و بەلێدانەکانی یەکلاکەرەوە نازناوی جامی خولەکانی لە بەرژەوەندیی خۆی یەکلاکردەوە.
لە خولەکی 23 لیۆنێل مێسی لە دەرەوەی ناوچەی سزا بەلێدانێکی بەهێز گۆڵی پێشکەوتنی بۆ یانەی ئینتەرمەیامی تۆمارکرد و نیوەی یەکەم لە بەرژەوەندیی یانەی میوان کۆتاییهات.
لە سەرەتای نیوەی دووەمدا، ناشڤیڵ ئەنجامەکەی لە رێگەی فافا پیکاولت یەکسانکردەوە و یارییەکەی گەڕاندەوە خاڵی سەرەتا.
دوای ئەم دوو گۆڵە، یاریزانانی هەردوو یانە هەوڵی زیاتریاندا بۆ ئەوەی گۆڵی زیاتر بکەن، بەڵام لە هەژاندنی تۆڕدا سەرکەوتوو نەبوون و کاتی ئاسایی یارییەکە بەیەکسانبوون بە گۆڵێک بۆ هەرلایەک کۆتاییهات.
بۆ یەکلاکردنەوەی نازناوی پاڵەوانێتییەکە هەردوو یانە پەنایان بردە بەر لێدانەکانی یەکلاکەرەوە، ئینتەرمەیامی بە 10 لێدان بەرامبەر 9 لێدان یارییەکەی بردەوە و بووە پاڵەوانی جامی خولەکان.
ئەمە یەکەمجارە لە مێژوودا ئینتەرمەیامی نازناوێک دەباتەوە، لیۆنێل مێسی لە پاڵەوانێتییەکەدا لە 7 یارییدا 10 گۆڵی تۆمارکرد و بووە گۆڵکاری پاڵەوانێتییەکە، جگە لەوەش خەڵاتی باشترین یاریزانی پاڵەوانێتییەکەی پێدرا.
دوای بردنەوەی یارییەکە، لیۆنێل مێسی ئامادەنەبوو خۆی جامەکە بەرزبکاتەوە و لەنێو ئاهەنگی یاریزانان و هاندەرانی یانەکەیدا جامی پاڵەوانێتییەکەی دایە کاپتنی پێشووی ئینتەرمەیامی و بەیەکەوە ئاهەنگیان بۆ بردنەوەی نازناوەکە گێڕا.
