چەند سەرنجێکی خێرا لەسەر شەڕی حەماس و ئیسرائیل

*پەلاماردانەکەی حەماس بۆ سەر ئیسرائیل ئەوەندە بەهێز و کاریگەربوو، ئیسرائیل بەوەوە ناوەستێت بەس لەغەزەدا تۆڵەبکاتەوە، پێموایە لەفەڵەستینەوە ئەپەڕێتەوە بۆ لوبنان و سوریا و ڕەنگە پڕیشکی بەر عێراقیش بکەوێ.

*ئیسرائیلیەکان کەئەڵێن ئەمەی ڕویدا11 سێپتەمبەری ئێمەیە، ئەیانەوێت بڵێن ئەمە خاڵی وەرچەرخانە و ئێمەش وەک ئەمەریکیەکان بۆ تۆڵەکردنەوە، تا ڕەگوڕیشەکان دەڕۆین “ئەمەریکا تا ئەفغانستان و عێراق هات”.

*جموجۆڵەکانی ئیسرائیل و ئەمەریکا لەتۆڵەسەندنەوەیەکی کورتخایەنی ئینفعالی ناچێت، بەڵکو لەتەگبیرێکی بەرفراوانی وائەچێ کەمەبەست لێی گۆڕانکاری بێت لەهاوکێشەی هێز لەناوچەکەدا، ئیسرائیل بە 48 کاتژمێر حکومەتێکی نوێی پێکهێنا کەئەتوانین ناوی بنێین حکومەتی جەنگ، حکومەتێک کەدەستەڵات و ئۆپۆزسیۆنی ئیسرائیل بەهەردوو باڵە توندەوە پێکەوە کۆکردەوە.

*ئەمجارە ئەمەریکا وەک 11 سێپتەمبەر خۆی لەپێشەوە نیە، بەڵکو سپۆنسەرە، چونکە ئەمەریکا کە بەهێزترین پارچە چەکی لەجیهاندا هێناوەتە دەریای سپی ناوەڕاست کە فرۆکەهەڵگری جیڕاڵد فۆردە “90 فرۆکەی پێشکەوتوی لەسەرەو 5 هەزار سەربازی تیایە” وادیارە ئیشی ئەم فرۆکەهەڵگرەش بۆ بەشداریکردن نیە لەتۆڵەکردنەوە لەحەماس بەڵکو بۆ ئەوەیە بەوڵاتانی چواردەور بڵێت ئیسرائیل هەرچی کرد، کەستان بۆتان نیە کۆسپی بۆ دروستبکەن، ئەوەتا من ئەیپارێزم.

*ئیسرائیل ئەزانێت کەهێرشەکەی حەماس بەدەستوخەتی فەڵەستینیەکان کراوە، بەڵام ئەشزانێ خیبرەکە ئێرانیە و چەک و تفاقەکەش لەو بازاڕەدا شیعیەدا دەستکەوتوە کەلەعێراقەوە دەستپێدەکات تا سوریا و باشوری لوبنان درێژبۆتەوە، بۆیە ئیسرائیل ئەمجارە فراوانتر تەماشای شانۆی ئۆپراسیۆنەکانی ئەکات.

*ئەمەی ڕویداو ڕوئەدات کاریگەری ئەبێ لەسەر هەریەک لە گفتوگۆی ئەمدواییەی ئێران و ئەمەریکا، ئاساییکردنەوەی پەیوەندی ئەمدواییەی سعودیە و ئیسرائیل، پێگەی هاوپەیمانی شیعەی حوکمڕان لەعێراق، پێگەی عەبدولفەتاح سیسی سەرۆکی میسڕ لەهەڵبژاردنەکاندا و چەندین لێکەوتەی تر.

*لەهەمووی گرنگتر ئەوەیە بایدنی سەرۆکی ئەمەریکا لەترسی کێبەرکێی بەهێزی تڕەمپ لەناوخۆی ئەمەریکا لەبەرەبەری نزیک بونەوەی هەڵبژاردنەکاندا، ناچارە بۆ پشتیوانی لۆبی جولەکە، لەدەرەوەی ئەمەریکا زۆر بەتوندی پشتیوانی ئیسرائیل بکات.

توانا عوسمان