لە سلێمانی ڕێژەی نەزۆکی زیادیکردووە
بەڕێوەبەری نەخۆشخانەی منداڵبوونی سلێمانی ئاماژە بەوە دەکات، لە پارێزگای سلێمانی رێژەی لەدایکبوون بە نەشتەرگەری زۆر لە ئاستی ستاندارد تێپەڕیوە و گەیشتووەتە 34٪، هەروەها ڕێژەی نەزۆکی لەناو خەڵکدا زیادیکردووە و “هۆکارەکەشی دەروونییە”.
د. شلێر فایەق، بەڕێوەبەری نەخۆشخانەی منداڵبوونی سلێمانی، رایگەیاند: “ئێستا رێژەی لەدایکبوون بە نەشتەرگەری زیادیکردووە. بەپێی بنەماکانی رێکخراوی تەندروستیی جیهانی دەبێت رێژەی لەدایکبوون بە نەشتەرگەری 25٪ زیاتر نەبێت، بەڵام لە سلێمانی رێژەکە لەو ستانداردە تێپەڕیوە و گەیشتووەتە نزیکەی 34٪.
بەڕێوەبەری نەخۆشخانەی منداڵبوونی سلێمانی باس لەوەش دەکات، لەدایکبوونی منداڵی بلووری زیادیکردووە، هۆکارەکەشی زیادبوونی سەنتەرەکانی منداڵبوونی بلوورییە لەو پارێزگایە. هەروەها لەبارەی نەزۆکی لە پارێزگای سلێمانییەوە دەڵێت: ئێستا نەزۆکیش زۆر زیادیکردووە و خەڵکێکی زۆر نەزۆکن و هۆکارەکەشی دەروونییە.
زیادبوونی لەدایکبوونی منداڵی بلووری و لەدایکبوون بە نەشتەرگەری، زیاتر لە ڕێژەی ستانداردی تەندروستیی جیهانی تێپەڕیوە و دکتۆرەکانی ئەو بوارەش، هۆشداری دەدەن بە هاووڵاتییان.
