پارتی و یه‌كێتی لەبارەی پۆستی سه‌رۆككۆمار گه‌یشتوون به‌رێككه‌وتن؟
پارتی و یه‌كێتی له‌باره‌ی كاندیدی هاوبه‌ش بۆ پۆستی سه‌رۆك كۆمار رێكنه‌كه‌وتون و گوته‌بێژی پارتیش ده‌ڵێت،” له‌قۆناغی گفتوگۆ داین”.
مه‌حموود مه‌حمه‌د گوته‌بێژی پارتی دیموكراتی كوردستان، ئه‌مڕۆ شه‌ممه 24ـی ئه‌یلوولی 2022، له كۆنفرانسێكی رۆژنامه‌وانیدا ده‌ڵێـت، پارتی و یه‌كێتی، له‌باره‌ی كاندیدی هاوبه‌ش بۆ پۆستی سه‌رۆككۆماری عێراق له‌قۆناغی گفتوگۆدان، تائێستا نه‌گه‌یشتوونه‌ته رێككه‌وتنی كۆتایی.
ئه‌وه له‌كاتێكدایه له‌هه‌فته‌ی رابردوو مه‌سعوود بارزانی سه‌رۆكی پارتی و بافڵ تاڵه‌بانی سه‌رۆكی یه‌كێتی له‌باره‌ی ئه‌و پرسه كۆبوونه‌وه، به‌ڵام راگه‌یه‌نراوی فه‌رمی و هاوبه‌شیان نه‌بوو.
هه‌روه‌ها به‌پێی ئه‌و زانیاریانه‌ی لێنزنیوز ئاگه‌داره، بڕیاره بۆ پێكهنانی حكوومه‌تی نوێ عێراق، هاوپه‌یمانێكی فراوان له (كورد و سوننه و چوارچێوه‌ی هاوئاهه‌نگی و مه‌سیحییه‌كان) پێكبهێنرێت.
هه‌روه‌ها لێنزنیوز زانیاری ئه‌وه‌یشی بۆ هاتووه، كه بڕیاره ئه‌م هه‌فته‌یه نێچیرڤان بارزانی سه‌رۆكی هه‌رێم و مه‌حمه‌د حه‌لبووسی سه‌رۆكی په‌رله‌مانی عێراق و هادی عامری سه‌رۆكی هاوپه‌یمانی فه‌تح، سه‌ردانی حه‌نانه بكه‌ن، بۆ ئه‌وه‌ی له‌گه‌ڵ موقته‌دا سه‌ر له‌باره‌ی پرسی پێكهێنانی حكوومه‌ت كۆببنه‌وه.
زیاتر له 11 مانگه هه‌ڵبژاردنی پێشوه‌خته‌ی 10/10/2021 عێراق كراوه، به‌ڵام به‌هۆی ناكۆكیی لایه‌نه‌كان و رێكنه‌كه‌وتنی هێزه سیاسییه‌كان، نه‌توانراوه حكوومه‌ت پێكبهێنرێت، بۆیه موقته‌دا سه‌در كه براوه‌ی یه‌كه‌می هه‌ڵبژاردن بوو له په‌رله‌مان كشایه‌وه.
